首页 -> 竞彩足球

係咪以为法比加斯转会曼联或者回归阿仙奴成功

来源: 时间:2014-02-03 20:23:34

大家见到我今日句金句,係咪以为法比加斯转会曼联或者回归阿仙奴成功,係咩?唔係喎!今季西甲虽然继续有美斯同C朗激斗,仲有加盟巴塞嘅「新比利」尼马,再加上由施蒙尼带领异军突起嘅马德里体育会,但都掩盖唔到法比加斯嘅光芒。

其实法比仔今季喺各项赛事加埋入咗11球及贡献13个助攻,以一个中场球员嚟讲可谓好唔错,整体成绩唔比受伤嘅美斯及刚加盟嘅尼马差,原因係因为教练马天奴。

巴塞喺佢执教之下,三线赛事西甲、西班牙盃同欧联都仲叫紧胡,呢名伯乐对法比加斯呢匹千里马好重要。法比加斯现时喺马天奴麾下比哥迪奥拿及维兰路华嘅时代更被看重,大部分都有正选之馀,好多时仲踢足90分钟咁济。

马帅理念任球员发挥

Peter都几锺意研究教练嘅思维,马天奴係一种另类教练,畀好多自由度球员,佢强调球队不需要标奇立异,任球员喺球场上自己发挥,几时节奏收慢,甚至踢得好迂迴都唔介意,因为喺马天奴嘅理念,落球场嘅始终係球员,唔係佢自己,咁样做畀到好大信心班球员,呢种方法有啲似NBA名帅积逊教练。

随住巴塞大脑沙维同恩尼斯达年纪渐大,法比加斯呢名曾经担当阿仙奴队长嘅中场球员,其位置更加稳如泰山,其他球队想撬佢根本冇可能。

金句:重见天日的法比加斯